Վարչապետ Նիկոլ Փաշինյանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ։
Զրուցակիցներն անդրադարձել են տարածաշրջանում տիրող իրավիճակին, Հայաստանի և Ադրբեջանի միջև խաղաղության պայմանագրի շուրջ ընթացող բանակցություններին, Լեռնային Ղարաբաղի հայերի իրավունքների և անվտանգության ապահովմանն ուղղված անհրաժեշտ քայլերին, այդ թվում՝ Բաքու–Ստեփանակերտ երկխոսության անհրաժեշտությանը։
Վարչապետ Փաշինյանն անդրադարձել է Ադրբեջանի կողմից Լաչինի միջանցքի անօրինական արգելափակման պատճառով Լեռնային Ղարաբաղում խորացող հումանիտար ճգնաժամին և ճգնաժամը հաղթահարելու համար անհրաժեշտ քայլերին։
Զրուցակիցներն ընդգծել են տարածաշրջանում կայունության և խաղաղության ապահովման համար հետևողական ջանքերի անհրաժեշտությունը։
Վարչապետ Փաշինյանը վերահաստատել է ՀՀ կառավարության հավատարմությունը խաղաղության օրակարգին։